அக்கா கணவருடன் தகாத உறவு; திருமணத்திற்கு தடையாக இருந்த வருங்கால கணவரை வனப்பகுதிக்கு அழைத்து கொன்ற இளம்பெண்

இந்தியாவின் ஜார்க்கண்ட் மாநிலத்தில், திருமணம் நிச்சயிக்கப்பட்டிருந்த இளம்பெண் ஒருவர் தனது வருங்கால கணவரை கொலை செய்ததாகக் கூறப்படும் சம்பவம் பெரும் அதிர்ச்சியை ஏற்படுத்தியுள்ளது. குறித்த இளம்பெண்ணுக்கு ஏற்கனவே தனது சகோதரியின் கணவருடன் தகாத உறவு இருந்ததாகவும், இந்த உறவு திருமணத்திற்குப் பின்னர் தொடர முடியாது என இருவரும் கருதியதாகவும் ஆரம்பகட்ட விசாரணைகளில் தெரியவந்துள்ளதாக தெரிவிக்கப்படுகிறது.

ஜமுவா சோக் பகுதியைச் சேர்ந்த இளம்பெண்ணுக்கு திருமணம் நிச்சயிக்கப்பட்டிருந்த நிலையில், அவருக்கும் அவரது சகோதரியின் கணவருக்கும் இடையே சில ஆண்டுகளுக்கு முன்பு பழக்கம் ஏற்பட்டதாக கூறப்படுகிறது. காலப்போக்கில் இந்த பழக்கம் காதல் உறவாக மாறியதாகவும், இருவரும் தொடர்ந்து தொடர்பில் இருந்ததாகவும் தகவல்கள் வெளியாகியுள்ளன.

இந்நிலையில், இளம்பெண்ணுக்கு திருமணம் நடைபெறவிருந்ததால், தனது வருங்கால கணவர் தங்களது உறவுக்கு தடையாக இருப்பார் என இருவரும் கருதியதாக பொலிஸ் விசாரணையில் தெரியவந்துள்ளதாக தெரிவிக்கப்படுகிறது. இதையடுத்து, வருங்கால கணவரை கொலை செய்ய இருவரும் திட்டமிட்டதாகக் கூறப்படுகிறது.

திட்டத்தின் ஒரு பகுதியாக, இளம்பெண் தனது வருங்கால கணவரை பீகார் எல்லைப் பகுதியில் அமைந்துள்ள பேலா வனப்பகுதிக்கு தனியாக வருமாறு அழைத்ததாகவும், இதனை நம்பி குறித்த இளைஞர் அங்கு சென்றதாகவும் தெரிவிக்கப்படுகிறது.

அங்கு ஏற்கனவே காத்திருந்த இளம்பெண்ணும் அவரது சகோதரியின் கணவரும் இணைந்து இளைஞனை கத்தியால் தாக்கி கொலை செய்ததாகவும், பின்னர் உடலை வனப்பகுதியில் விட்டுச் சென்றதாகவும் பொலிஸார் தெரிவித்துள்ளனர்.

இளைஞர் காணாமல் போனதைத் தொடர்ந்து அவரது குடும்பத்தினர் பொலிஸில் புகார் அளித்தனர். இதையடுத்து மேற்கொள்ளப்பட்ட விசாரணைகளில், அவருடன் தொடர்பில் இருந்த நபர்கள் மீது பொலிஸாருக்கு சந்தேகம் ஏற்பட்டதாகவும், தொடர்ந்து மேற்கொள்ளப்பட்ட விசாரணைகளின் அடிப்படையில் குறித்த இளம்பெண்ணும் அவரது சகோதரியின் கணவரும் கைது செய்யப்பட்டதாகவும் தெரிவிக்கப்படுகிறது.

திருமணத்திற்கு முன்பாக ஏற்பட்டதாகக் கூறப்படும் தகாத உறவு, இறுதியில் ஒரு இளைஞரின் உயிரைப் பறித்த கொடூர சம்பவமாக மாறியுள்ளதாக இந்த சம்பவம் அதிர்ச்சியை ஏற்படுத்தியுள்ளது. வழக்கில் கைது செய்யப்பட்டுள்ள சந்தேகநபர்கள் மீதான குற்றச்சாட்டுகள் தொடர்பான மேலதிக விசாரணைகள் தொடர்ந்து நடைபெற்று வருகின்றன.