அரசாங்கத்தின் செயல்திறன் குறைவால் மக்கள் கடும் சிரமங்களை எதிர்கொள்கின்றனர் என ஐக்கிய மக்கள் சக்தி குற்றச்சாட்டு

தற்போதைய தேசிய மக்கள் சக்தி அரசாங்கத்தின் செயல்திறன் குறைபாடு காரணமாக பொதுமக்கள் பல்வேறு பொருளாதார மற்றும் வாழ்வாதார சிரமங்களை எதிர்கொண்டு வருவதாக ஐக்கிய மக்கள் சக்தி குற்றஞ்சாட்டியுள்ளது.

நாடாளுமன்ற உறுப்பினர் எஸ்.எம். மரிக்கார் கருத்து தெரிவிக்கையில், அரசாங்கத்தின் அமைச்சர்கள் ஆரம்பத்தில் கடைப்பிடித்த அமைதியான மற்றும் கனிவான அணுகுமுறை தற்போது மாறி, ஊடகவியலாளர்களையே அச்சுறுத்தும் நிலைக்கு சென்றுள்ளதாக தெரிவித்தார். அரசாங்கத்தின் நிர்வாகத் தவறுகள் மற்றும் திறமையின்மையை மறைக்க முடியாத சூழ்நிலையிலேயே இவ்வாறான நடவடிக்கைகள் இடம்பெறுவதாகவும் அவர் குற்றம்சாட்டினார்.

நாட்டில் பெரும்பாலான மக்களுக்கு மூன்று வேளை உணவைப் பெற்றுக்கொள்வதே சவாலாக மாறியுள்ளதாகவும், மின்சாரக் கட்டணம் மற்றும் எரிபொருள் விலை உயர்வால் மக்களின் வாழ்க்கைச் செலவு மேலும் அதிகரித்துள்ளதாகவும் அவர் தெரிவித்தார். மேலும், தற்போதைய அரசு குறுகிய காலத்திற்குள் இரண்டு முறை எரிபொருள் விலையை உயர்த்தியுள்ளதாகவும் அவர் சுட்டிக்காட்டினார்.

கடந்த கால அரசுகளின் ஆட்சிக்காலங்களில் அரசு ஊழியர்களுக்கு வீடுகள் மற்றும் மோட்டார் சைக்கிள்கள் போன்ற நலத்திட்டங்கள் வழங்கப்பட்டதாகக் குறிப்பிட்ட அவர், தற்போதைய ஆட்சியில் அரசு ஊழியர்களின் சம்பள உயர்வு தொடர்பாக தெளிவான முன்னேற்றம் எதுவும் இல்லை என்றும் விமர்சித்தார்.

விவசாயிகளின் நலனை முன்னிறுத்துவதாகக் கூறிய அரசாங்கம், தற்போது நெல் கொள்வனவுக்கான நியாயமான விலையை வழங்க முடியாத நிலைக்கு தள்ளப்பட்டுள்ளதாகவும், இதன் காரணமாக விவசாயிகள் கடுமையாகப் பாதிக்கப்பட்டுள்ளதாகவும் அவர் தெரிவித்தார்.

அதேபோன்று, எதிர்க்கட்சியாக இருந்தபோது டெங்கு நோய் தொடர்பாக தொடர்ந்து குரல் எழுப்பிய தற்போதைய ஆட்சியினர், இன்று அதிகரித்து வரும் டெங்கு பரவலை கட்டுப்படுத்துவதில் போதுமான நடவடிக்கைகளை எடுக்கத் தவறியுள்ளதாகவும், இந்த விவகாரத்தில் அரசாங்கத்தின் நிர்வாகத் திறன் கேள்விக்குறியாக இருப்பதாகவும் எஸ்.எம். மரிக்கார் குற்றஞ்சாட்டினார்.