ஹொரணையில் பதின்ம வயது சிறுமியை துன்புறுத்திய தாய் கைது - மருத்துவமனையில் அம்பலமான அதிர்ச்சி சம்பவம்

களுத்துறை மாவட்டம் ஹொரணை பகுதியில் 14 வயதுடைய தனது மகளை தொடர்ச்சியாக கடித்து மற்றும் கொடூரமாக தாக்கி துன்புறுத்திய குற்றச்சாட்டில் தாய் ஒருவர் கைது செய்யப்பட்டுள்ளார்.

சிறுமி உடல் நலக்குறைவு காரணமாக ஹொரணை மாவட்ட வைத்தியசாலையில் அனுமதிக்கப்பட்டதன் பின்னரே இந்தச் சம்பவம் வெளிச்சத்திற்கு வந்துள்ளதாக மருத்துவமனை வட்டாரங்கள் தெரிவித்துள்ளன.

வைத்தியசாலையில் மேற்கொள்ளப்பட்ட பரிசோதனைகளின் போது, சிறுமியின் உடலில் காணப்பட்ட காயங்கள் மற்றும் அவர் வழங்கிய தகவல்களின் அடிப்படையில் இது நீண்ட காலமாக நடைபெற்று வந்த துன்புறுத்தல் என ஆரம்ப விசாரணைகளில் தெரியவந்துள்ளது.

இதனைத் தொடர்ந்து, உரிய அதிகாரிகளுக்கு உடனடியாக அறிவிக்கப்பட்டு, சம்பவம் தொடர்பில் பொலிஸார் விசாரணைகளை ஆரம்பித்துள்ளனர். விசாரணைகளில், குறித்த தாய் தனது மகளை நீண்ட காலமாக தொடர்ந்து தாக்கி வந்ததுடன், உடலில் கடித்த காயங்களையும் ஏற்படுத்தியுள்ளதாக கூறப்படுகிறது.

இந்த தொடர்ச்சியான துன்புறுத்தலால் சிறுமி கடுமையான மன உளைச்சலுக்கும், மனஅழுத்தத்துக்கும் உள்ளாகியுள்ளதாகவும் மருத்துவமனை வட்டாரங்கள் தெரிவித்துள்ளன.

சிறுமி தற்போது வைத்தியசாலையில் சிகிச்சை பெற்று வருவதாகவும், அவரது உடல் மற்றும் மனநிலை குறித்து மேலதிக மருத்துவ மதிப்பீடுகள் மேற்கொள்ளப்பட்டு வருவதாகவும் தெரிவிக்கப்பட்டுள்ளது.

சம்பவம் தொடர்பான மேலதிக விசாரணைகள் பொலிஸாரால் தொடர்ந்து முன்னெடுக்கப்பட்டு வருகின்றன.