பிரித்தானியாவில் வசிக்கும் இலங்கைத் தாய் மற்றும் மூன்று பிள்ளைகளுக்கு நாடு கடத்தல் உத்தரவு

பிரித்தானியாவில் வசித்து வரும் இலங்கைப் பெண் ஒருவருக்கும் அவரது மூன்று பிள்ளைகளுக்கும் நாட்டை விட்டு வெளியேறுமாறு பிரித்தானிய உள்துறை அமைச்சு உத்தரவிட்டுள்ளதாக தகவல் வெளியாகியுள்ளது.

பிரித்தானியாவில் உதவி ஆசிரியையாக பணியாற்றி வரும் 45 வயதுடைய சமிலா தில்ரக்ஷி மற்றும் அவரது மூன்று பிள்ளைகளே இந்த உத்தரவால் பாதிக்கப்பட்டுள்ளனர். எனினும், அவரது கணவரான ரசிக சமரசிங்கவிற்கு பிரித்தானியாவில் தொடர்ந்து தங்கியிருந்து பணியாற்றுவதற்கான அனுமதி வழங்கப்பட்டுள்ளதாக தெரிவிக்கப்படுகிறது.

குறித்த குடும்பம் 2022ஆம் ஆண்டு புதிய விசா நடைமுறைகளின் கீழ் சட்டப்பூர்வமாக பிரித்தானியாவிற்கு குடிபெயர்ந்ததாகவும், அனைத்து விதிமுறைகளையும் பின்பற்றி அந்நாட்டில் வாழ்ந்து வந்ததாகவும் தெரிவிக்கப்பட்டுள்ளது. இந்த நிலையில் திடீரென வெளியிடப்பட்டுள்ள நாடு கடத்தல் உத்தரவு குடும்பத்திற்கு பெரும் அதிர்ச்சியை ஏற்படுத்தியுள்ளதாக சமிலா தில்ரக்ஷி தெரிவித்துள்ளார்.

பிரித்தானிய உள்துறை அமைச்சின் அறிவிப்பின் படி, குறிப்பிட்ட கால எல்லைக்குள் தானும் தனது மூன்று பிள்ளைகளும் நாட்டை விட்டு வெளியேற வேண்டும் என அறிவுறுத்தப்பட்டுள்ளதாக அவர் கூறியுள்ளார். அதேவேளை, தனது கணவருக்கு மட்டும் பிரித்தானியாவில் தங்குவதற்கான அனுமதி வழங்கப்பட்டிருப்பது குடும்பத்தின் எதிர்காலம் குறித்த கவலையை அதிகரித்துள்ளதாகவும் அவர் குறிப்பிட்டுள்ளார்.

இந்த உத்தரவு அமுல்படுத்தப்பட்டால், பிள்ளைகள் தந்தையிடமிருந்து பிரிந்து வாழ வேண்டிய சூழ்நிலை உருவாகும் என்றும், இது அவர்களின் மனநலன் மற்றும் எதிர்கால வளர்ச்சியில் பாதிப்பை ஏற்படுத்தக்கூடும் என்றும் குடும்பத்தினர் சுட்டிக்காட்டியுள்ளனர்.

எனவே, குடும்ப ஒற்றுமை மற்றும் பிள்ளைகளின் நலனை கருத்தில் கொண்டு இந்த விவகாரத்தை மனிதாபிமான அடிப்படையில் மீளாய்வு செய்யுமாறு பிரித்தானிய உள்துறை அமைச்சிடம் பாதிக்கப்பட்ட இலங்கை குடும்பம் கோரிக்கை விடுத்துள்ளது.