மனைவிக்கு மயக்க மருந்து கொடுத்து தொடர் பாலியல் துஷ்பிரயோகம்? பிரித்தானிய கணவர் உட்பட பேர் நீதிமன்ற விசாரணையில்

பிரித்தானியாவின் மான்செஸ்டர் பகுதியில் மனைவியை நீண்டகாலமாக பாலியல் துஷ்பிரயோகத்திற்கு உட்படுத்தியதாக குற்றம் சாட்டப்பட்டுள்ள 60 வயதுடைய நபர் உட்பட 13 பேர் தொடர்புடைய வழக்கு தற்போது நீதிமன்ற விசாரணைக்கு வந்துள்ளது.

ஸ்டாக்போர்ட்டைச் சேர்ந்த குறித்த நபர், தனது மனைவிக்கு மயக்க மருந்து கொடுத்து அவரது அனுமதியின்றி பாலியல் துஷ்பிரயோகத்திற்கு உட்படுத்தியதாகவும், இந்த சம்பவங்களில் மேலும் 12 ஆண்கள் ஈடுபட்டதாகவும் அரசுத் தரப்பு குற்றம் சாட்டியுள்ளது.

அவரது மனைவியின் தனியுரிமையை பாதுகாக்கும் நோக்கில், பொலிஸார் குறித்த கணவரின் அடையாளத்தை பொதுவெளியில் வெளியிடவில்லை. ஆரம்பத்தில் அவர் தமக்கு எதிரான அனைத்து குற்றச்சாட்டுகளையும் மறுத்திருந்ததாக தெரிவிக்கப்படுகிறது.

அவருக்கு எதிராக 2004ஆம் ஆண்டு முதல் இடம்பெற்றதாகக் கூறப்படும் 48 குற்றச்சாட்டுகள் முன்வைக்கப்பட்டுள்ளன. இதில் பாலியல் வன்கொடுமை, ஊடுருவல் தாக்குதல் மற்றும் மனைவியின் அனுமதியின்றி அவரது அந்தரங்கப் படங்களை பகிர்ந்தமை உள்ளிட்ட குற்றச்சாட்டுகளும் அடங்குகின்றன.

பின்னர் அவர் 15 குற்றச்சாட்டுகளை ஒப்புக்கொண்டதாக அரசுத் தரப்பு தெரிவித்துள்ளது. எஞ்சியுள்ள 33 குற்றச்சாட்டுகளை அவர் தொடர்ந்து மறுத்து வருவதாகவும் தெரிவிக்கப்படுகிறது.

இந்த வழக்கில் மேலும் 12 ஆண்கள் இணை பிரதிவாதிகளாக குறிப்பிடப்பட்டுள்ளனர். இவர்களுக்கு எதிராகவும் பாலியல் வன்கொடுமை, பாலியல் தாக்குதல் மற்றும் குற்றச்செயல்களுக்கு சதி செய்தல் உள்ளிட்ட பல்வேறு குற்றச்சாட்டுகள் முன்வைக்கப்பட்டுள்ளன. எனினும், அவர்களில் அனைவரும் தங்களுக்கு எதிரான குற்றச்சாட்டுகளை மறுத்துள்ளதாக தெரிவிக்கப்படுகிறது.

அரசுத் தரப்பு தரப்பின் கூற்றுப்படி, குற்றங்கள் இடம்பெற்றதாகக் கூறப்படும் காலப்பகுதியில் சிலர் குறித்த தம்பதியினர் வசித்த ஸ்டாக்போர்ட் வீட்டிற்கு அழைக்கப்பட்டதாகவும் தெரிவிக்கப்பட்டுள்ளது.

இந்த வழக்கில் ஸ்கொட்லாந்தைச் சேர்ந்த கீத் ஃபோதரிங்ஹாம் என்பவரும் தனித்த குற்றச்சாட்டுகளை எதிர்கொண்டு, சில குற்றச்சாட்டுகளை ஒப்புக்கொண்டுள்ளதாக தெரிவிக்கப்படுகிறது. மேலும் பல்வேறு பகுதிகளைச் சேர்ந்த மற்ற நபர்களும் இந்த வழக்கில் இணைக்கப்பட்டுள்ளனர்.

மொத்தம் 12 வாரங்களுக்கு விசாரணை நடைபெறவுள்ளதாக தெரிவிக்கப்பட்டுள்ள நிலையில், குறித்த நபர்கள் மின்ஷல் ஸ்ட்ரீட் கிரவுன் நீதிமன்றத்தில் வழக்கை எதிர்கொள்ள உள்ளனர்.

இந்நிலையில், வழக்கில் முன்வைக்கப்பட்டுள்ள குற்றச்சாட்டுகள் தொடர்பான நீதிமன்ற விசாரணைகள் தொடர்ந்து நடைபெற்று வருகின்றன. குற்றச்சாட்டுகள் மற்றும் ஒப்புக்கொள்ளப்பட்ட விடயங்கள் தொடர்பான இறுதி சட்டத் தீர்ப்பு நீதிமன்ற நடவடிக்கைகளின் முடிவிலேயே உறுதி செய்யப்படும்.