ஜனாதிபதிக்கு பிரான்ஸ் விசா மறுக்கப்பட்டதா? வதந்திகளுக்கு முற்றுப்புள்ளி வைத்த அமைச்சர் நளிந்த ஜயதிஸ்ஸ

ஜனாதிபதி அனுர குமார திஸாநாயக்கவின் பிரான்ஸ் நாட்டிற்கான உத்தியோகபூர்வ விஜயம் விசா மறுக்கப்பட்டதால் ஒத்திவைக்கப்பட்டதாக சமூக ஊடகங்களில் பரவி வரும் தகவல்கள் முற்றிலும் பொய்யானவை என அமைச்சரவைப் பேச்சாளரும் அமைச்சருமான நளிந்த ஜயதிஸ்ஸ தெரிவித்துள்ளார்.

அமைச்சரவை தீர்மானங்களை அறிவிக்கும் ஊடகவியலாளர் சந்திப்பில் கருத்து வெளியிட்ட அவர், ஜனாதிபதியின் பிரான்ஸ் பயணம் இரு நாடுகளுக்கும் இடையிலான இராஜதந்திர இணக்கப்பாட்டின் அடிப்படையிலேயே ஒத்திவைக்கப்பட்டதாக தெளிவுபடுத்தினார்.

சமூக ஊடகங்களில் பரவி வரும் விசா மறுப்பு குறித்த தகவல்களுக்கு எந்தவிதமான உண்மைத்தன்மையும் இல்லை என்றும், அவை பொதுமக்களை தவறாக வழிநடத்தும் நோக்கில் திட்டமிட்டு பரப்பப்படும் வதந்திகள் என்றும் அமைச்சர் குறிப்பிட்டார்.

மேலும், இத்தகைய போலியான தகவல்களை உருவாக்கி சமூக ஊடகங்களில் பரப்புபவர்களுக்கு எதிராக சட்ட நடவடிக்கை எடுக்கும் வகையில் இணையவழி பாதுகாப்புச் சட்டம் (Cyber Security Law) தயாரிக்கப்பட்டு வருவதாகவும் அவர் தெரிவித்தார்.

அமைச்சர் நளிந்த ஜயதிஸ்ஸவின் விளக்கத்தின்படி, பிரான்ஸ் மற்றும் இலங்கை அரசுகளுக்கு இடையிலான இருதரப்பு பேச்சுவார்த்தைகள் மற்றும் இராஜதந்திர இணக்கப்பாடுகளின் அடிப்படையிலேயே இந்த உத்தியோகபூர்வ விஜயம் பின்னர் நடைபெறுமாறு ஒத்திவைக்கப்பட்டுள்ளது.

அத்துடன், ஜனாதிபதியின் பிரான்ஸ் பயணத்திற்கான திகதி குறித்து இலங்கை அரசோ அல்லது பிரான்ஸ் தூதரகமோ இதுவரை எந்த உத்தியோகபூர்வ அறிவிப்பையும் வெளியிடவில்லை என்றும் அவர் சுட்டிக்காட்டினார்.

எதிர்காலத்தில் இரு தரப்பிற்கும் ஏற்ற புதிய திகதி நிர்ணயிக்கப்பட்ட பின்னர், அதற்கான உத்தியோகபூர்வ அறிவிப்பு வெளியிடப்படும் எனவும் அமைச்சர் நளிந்த ஜயதிஸ்ஸ உறுதியளித்துள்ளார்.