புலம்பெயர் இலங்கையர்களுக்கு வாக்குரிமை வழங்க அரசு நடவடிக்கை; புதிய வேலைத்திட்டம் விரைவில்

வெளிநாடுகளில் வாழும் இலங்கையர்களுக்கு வாக்குரிமை வழங்கும் நோக்கில் அரசாங்கம் விரிவான வேலைத்திட்டம் ஒன்றை தயாரித்து வருவதாக வெளிவிவகார அமைச்சர் விஜித ஹேரத் நாடாளுமன்றத்தில் தெரிவித்துள்ளார்.

புலம்பெயர் இலங்கையர்களின் ஜனநாயக உரிமைகளை உறுதிப்படுத்தும் முக்கிய நடவடிக்கையாக இந்த திட்டம் பார்க்கப்படுகிறது. வெளிநாடுகளில் நிரந்தரமாகவும் தற்காலிகமாகவும் வசித்து வரும் இலங்கையர்கள் எதிர்காலத்தில் தேர்தல்களில் வாக்களிக்கும் வாய்ப்பைப் பெறும் வகையில் தேவையான சட்ட மற்றும் நிர்வாக ஏற்பாடுகள் மேற்கொள்ளப்பட உள்ளதாக அமைச்சர் குறிப்பிட்டார்.

அமைச்சரின் விளக்கத்தின்படி, பொது நிர்வாக அமைச்சினால் நியமிக்கப்பட்ட குழுவின் அறிக்கையும், தேர்தல் ஆணைக்குழுவின் பரிந்துரைகளும் அடிப்படையாகக் கொண்டு அரசாங்கம் முறையான செயல் திட்டத்தை உருவாக்கி வருகிறது.

இதன் மூலம் வெளிநாடுகளில் வசிக்கும் இலங்கையர்களும் நாட்டின் தேர்தல் நடவடிக்கைகளில் நேரடியாக பங்கேற்கும் வாய்ப்பு உருவாகும் என எதிர்பார்க்கப்படுகிறது.

வெளிநாடுகளில் பணிபுரியும் இலங்கையர்களுக்காக பங்களிப்பு அடிப்படையிலான ஓய்வூதியத் திட்டத்தையும் அறிமுகப்படுத்த அரசு ஆரம்பகட்ட நடவடிக்கைகளை மேற்கொண்டு வருகிறது.

ஆனால், ஒவ்வொரு நாட்டிலும் வேலை ஒப்பந்த காலம் மற்றும் பணிச்சூழல் மாறுபடுவதால், அனைவருக்கும் பொருந்தக்கூடிய பொதுவான நடைமுறையை உருவாக்குவதில் சில சவால்கள் இருப்பதாக அமைச்சர் தெரிவித்தார்.

இருப்பினும், தொழில்நுட்ப மற்றும் நிர்வாக சிக்கல்கள் தீர்க்கப்பட்டவுடன் இந்தத் திட்டம் நடைமுறைக்கு கொண்டு வரப்படும் என்றும் அவர் உறுதியளித்தார்.

புலம்பெயர் இலங்கையர்கள் அரசாங்கத்துடன் நேரடியாக தொடர்பு கொள்ளும் வசதியாக "Lanka Connect" என்ற புதிய செயலியும் இணையதளமும் அறிமுகப்படுத்தப்பட்டுள்ளதாக அமைச்சர் அறிவித்தார்.

இந்த தளத்தின் மூலம்:

நாட்டின் பொருளாதாரத்திற்கு வெளிநாடுகளில் பணிபுரியும் இலங்கையர்கள் வழங்கும் அந்நியச் செலாவணி மிகப்பெரிய பங்களிப்பாக இருப்பதால், அவர்களின் நலன், சமூக பாதுகாப்பு மற்றும் அரசியல் உரிமைகளை மேம்படுத்த அரசாங்கம் முன்னுரிமை அளித்து வருவதாகவும் அமைச்சர் தெரிவித்தார்.

வாக்குரிமை, ஓய்வூதிய பாதுகாப்பு மற்றும் டிஜிட்டல் சேவைகள் ஆகியவை புலம்பெயர் இலங்கையர்களுக்கும் அரசாங்கத்திற்கும் இடையிலான உறவை மேலும் வலுப்படுத்தும் முக்கிய முயற்சிகளாகக் கருதப்படுகின்றன.