கப்பல் விவகாரம்: வீரர்கள் கப்பலிலேயே தங்கியுள்ள நிலையில் நீடிக்கும் ராஜதந்திரப் பதற்றம்!

கொழும்பு துறைமுகத்தின் பண்டாரநாயக்க முனையத்திற்குக் கொண்டு வரப்பட்ட ஈரானியக் கடற்படைக்குச் சொந்தமான IRIS BUSHEHR கப்பலில், இன்னும் 15 ஈரானியச் சிப்பாய்கள் அதன் பாதுகாப்பு மற்றும் தொழில்நுட்ப வழிகாட்டலுக்காகத் தங்கியுள்ளதாகப் பொலிஸார் தெரிவித்துள்ளனர். முன்னதாக இக்கப்பலில் இருந்த 219 பேரில், 204 வீரர்கள் மனிதாபிமான அடிப்படையில் மீட்கப்பட்டு, மருத்துவப் பரிசோதனைகளுக்குப் பின்னர் வெலிசர கடற்படை முகாமில் தற்காலிகமாகத் தங்க வைக்கப்பட்டுள்ளனர். இயந்திரக் கோளாறு காரணமாக இக்கப்பலைத் திருகோணமலைக்குக் கொண்டு செல்வதில் தாமதம் ஏற்பட்டுள்ள நிலையில், தற்போது அது இலங்கை கடற்படையின் நேரடி மேற்பார்வையில் உள்ளது.

முக்கிய பின்னணித் தகவல்கள்

 இந்தியக் கடற்படையின் 'மிலன் 2026' பயிற்சியை முடித்துத் திரும்பிக் கொண்டிருந்த போது, அமெரிக்காவின் டார்பிடோ தாக்குதலில் IRIS DENA கப்பல் மூழ்கடிக்கப்பட்டது. இதில் 87 பேர் உயிரிழந்தனர் (84 உடல்கள் மீட்கப்பட்டுள்ளன).

 இலங்கை கடற்படை மற்றும் விமானப்படை இணைந்து நடத்திய தேடுதல் வேட்டையில் 32 பேர் உயிருடன் மீட்கப்பட்டனர். அவர்களில் காயமடைந்த 22 பேர் சிகிச்சை முடிந்து தற்போது காலி கராப்பிட்டிய வைத்தியசாலையிலிருந்து விடுவிக்கப்பட்டுள்ளனர்.

 ஈரானிய வீரர்களுக்குப் புகலிடம் அளித்தமை மற்றும் மனிதாபிமான உதவி வழங்கியமை தொடர்பாக அமெரிக்காவுக்கும் இலங்கைக்கும் இடையே மறைமுக ராஜதந்திர முரண்பாடுகள் உருவாகியுள்ளன. ஈரானியர்களைத் திருப்பி அனுப்ப வேண்டாம் என அமெரிக்கா அழுத்தம் கொடுப்பதாகத் தகவல்கள் வெளியாகியுள்ள போதிலும், சர்வதேசச் சட்டங்களுக்கு (Hague Convention) உட்பட்டே தாம் செயற்படுவதாக இலங்கை அரசு உறுதியாகத் தெரிவித்துள்ளது.