கொழுப்பு கல்லீரல் நோய்: கவனிக்க வேண்டிய முக்கிய அறிகுறிகள்

உடலில் தோன்றும் சில குறிப்பிட்ட அறிகுறிகள், கொழுப்பு கல்லீரல் நோயின் எச்சரிக்கை அடையாளங்களாக இருக்கலாம். கல்லீரலில் அதிக அளவில் கொழுப்பு சேரும் நிலையே கொழுப்பு கல்லீரல் நோய் எனப்படுகிறது. கல்லீரலின் மொத்த எடையில் 5 முதல் 10 சதவீதத்திற்கும் அதிகமாக கொழுப்பு இருந்தால், அது இந்த நோயாக கருதப்படுகிறது.

ஆரம்ப கட்டங்களில் இந்த நோய் பெரும்பாலும் எந்தத் தெளிவான அறிகுறிகளையும் காட்டாது. இதனால் பலர் கவனிக்காமல் விடுகின்றனர். ஆனால் நிலை மோசமடைந்தபின் சில அறிகுறிகள் வெளிப்படத் தொடங்கும்.

முதல் அறிகுறியாக அடிக்கடி சோர்வு காணப்படும். கல்லீரல் உடலின் சக்தி மையமாக செயல்படுகிறது. அது சரியாக செயல்படாதபோது உடல் எப்போதும் சோர்வாக இருக்கும்.

இரண்டாவது அறிகுறியாக வயிற்றின் வலது பக்கத்தில், விலா எலும்புகளுக்குக் கீழே லேசான வலி, அசௌகரியம் அல்லது கனமான உணர்வு ஏற்படலாம். கல்லீரலில் கொழுப்பு சேர்ந்து அது வீங்குவதால் இந்த உணர்வு தோன்றும்.

மூன்றாவது முக்கிய அறிகுறியாக மஞ்சள் காமாலை ஏற்படலாம். கல்லீரல் சேதமடைந்தால் உடலில் பிலிரூபின் அளவு அதிகரித்து கண்கள் மற்றும் தோலின் வெள்ளைப் பகுதி மஞ்சள் நிறமாக மாறும்.

நிலை மேலும் மோசமடைந்தால் வயிற்றில் திரவம் சேர்ந்து வயிறு வீங்கிய தோற்றம் பெறலாம். கர்ப்பிணிப் பெண் போல வயிறு முன்னே நீண்டு காணப்படுவது கடுமையான பாதிப்பின் அறிகுறியாக இருக்கலாம்.

உடல் பருமன் அதிகரித்தவர்கள் மற்றும் நீரிழிவு நோயாளிகள் இந்த நோய்க்கு அதிக ஆபத்தில் உள்ளவர்கள். எனவே மேற்கண்ட அறிகுறிகள் தென்பட்டால் தாமதிக்காமல் மருத்துவ பரிசோதனை செய்து சிகிச்சை பெறுவது அவசியமாகும்.