.png){kind=logo}
.jpeg)
மத்திய கிழக்கு பிராந்தியத்தில் தற்போது நிலவி வரும் தீவிர போர் பதற்றம் காரணமாக, இலங்கையின் சுற்றுலாத் துறை பாரிய பின்னடைவைச் சந்திக்க நேரிடும் என சுற்றுலாத்துறை பிரதி அமைச்சர் ருவான் ரணசிங்க கவலை வெளியிட்டுள்ளார். குறிப்பாக மார்ச் மாதத்தில் இலங்கைக்கு வருகை தரும் சர்வதேச சுற்றுலாப் பயணிகளின் எண்ணிக்கையில் பாரிய வீழ்ச்சி ஏற்படக்கூடும் என அவர் சுட்டிக்காட்டியுள்ளார். ஐரோப்பிய நாடுகள் மற்றும் உலகின் ஏனைய பகுதிகளிலிருந்து இலங்கைக்கு வரும் பயணிகள் பெரும்பாலும் மத்திய கிழக்கு பிராந்தியத்திலுள்ள வான்வழிப் பாதைகளையும் விமான நிலையங்களையுமே பிரதானமாகப் பயன்படுத்துகின்றனர்.
தற்போதைய சூழலில் அங்கு நிலவும் பாதுகாப்பு அச்சுறுத்தலால் பல விமான நிலையங்கள் மூடப்படுவதும், விமானங்கள் ரத்து செய்யப்படுவதும் இலங்கைக்கு வரும் பயணிகளின் வரவை நேரடியாகப் பாதித்துள்ளது. இந்தத் தாக்கத்தின் விளைவாக, இலங்கையின் சுற்றுலாத் துறையில் வாரத்திற்கு சுமார் 10 முதல் 12 மில்லியன் அமெரிக்க டொலர்கள் வரை நிதி இழப்பு ஏற்பட வாய்ப்புள்ளதாக மதிப்பிடப்பட்டுள்ளது. இது நாட்டின் அந்நியச் செலாவணி கையிருப்பு மற்றும் பொருளாதார மீட்சியில் பெரும் தாக்கத்தை ஏற்படுத்தும் என எதிர்பார்க்கப்படுகிறது. நேற்று ஊடகங்களுக்குக் கருத்துத் தெரிவித்த போதே பிரதி அமைச்சர் இந்தத் தகவல்களைப் பகிர்ந்து கொண்டார்.
சுற்றுலாப் பயணிகளின் பாதுகாப்பை உறுதிப்படுத்துவதோடு, மாற்று வழிமுறைகள் குறித்து அதிகாரிகள் ஆராய்ந்து வருகின்றனர். சர்வதேச விமானப் போக்குவரத்து மீண்டும் சீரடைந்தால் மட்டுமே சுற்றுலாத் துறையில் பழைய நிலையை எட்ட முடியும் என நிபுணர்கள் கருதுகின்றனர். நாட்டின் தற்போதைய பொருளாதாரச் சூழலில் இந்த இழப்பு ஒரு பாரிய சவாலாகவே பார்க்கப்படுகிறது.
கருத்துகள்
கருத்தைப் பதிவிடுக