உலகின் மிகக் குறுகலான வீடு - வெறும் செ.மீ இடத்தில் இவ்வளவு வசதிகளா!

போலந்து நாட்டின் வார்சா நகரில் அமைந்துள்ள கெரெட் ஹவுஸ் (Keret House), அதன் அதீத குறுகிய அமைப்பால் உலகின் மிகக் குறுகலான வீடுகளில் ஒன்றாகப் பார்க்கப்படுகிறது.

இரண்டு கட்டிடங்களுக்கு இடையே இருந்த வெறும் 72 செ.மீ அகலமுள்ள இடத்தைப் பயன்படுத்தி இந்த வீடு கட்டப்பட்டுள்ளது.

இதன் அதிகபட்ச அகலம் 122 செ.மீ. வரை இருக்கும். போலந்து கட்டிடக் கலைஞர் ஜாகுப் ஷெஸ்னி, பயன்படுத்தப்படாமல் இருந்த இந்தக் குறுகிய இடத்தைப் பார்த்து, அதை பயனுள்ள வசிப்பிடமாக மாற்றும் யோசனையில் இவ்வீட்டை வடிவமைத்தார்.

சுமார் 150 சதுர அடி பரப்பளவு கொண்ட இந்த வீடு, கிடைக்கும் ஒவ்வொரு செ.மீ இடத்தையும் திறமையாகப் பயன்படுத்தும் வகையில் அமைக்கப்பட்டுள்ளது.

மூன்று நிலைகளைக் கொண்ட இந்த வீட்டில் நுழைவுப் பகுதி, சிறிய சமையலறை, அமரும் மற்றும் சாப்பிடும் இடம், குளியலறை, வேலை செய்யும் பகுதி மற்றும் தூங்கும் இடம் உள்ளிட்ட அத்தியாவசிய வசதிகள் உள்ளன.

இவ்வளவு குறுகிய இடத்திலும் ஷவர், கழிப்பறை, சேமிப்பிடம் போன்ற வசதிகள் இடம்பெற்றுள்ளன. மேற்கூரையில் அமைக்கப்பட்டுள்ள ஸ்கைலைட் மூலம் இயற்கை வெளிச்சமும் வீட்டுக்குள் கிடைக்கிறது.

முக்கிய சாலையிலிருந்து நேரடியாக நுழைய முடியாத வகையில் அமைக்கப்பட்டுள்ள இந்த வீட்டை, குறுகிய சந்துப் பாதை மற்றும் படிக்கட்டுகள் வழியாகச் சென்றே அடைய முடியும். இந்த வீடு இஸ்ரேலிய எழுத்தாளர் எட்கர் கெரெட்டுக்காக உருவாக்கப்பட்டது.

அவர் இதை வேலை செய்யும் இடமாகவும், அவ்வப்போது தங்கும் இடமாகவும் பயன்படுத்துகிறார். சுமார் மூன்று ஆண்டுகால கட்டுமானப் பணிகளுக்குப் பின்னர் 2012 அக்டோபரில் வீடு நிறைவடைந்தது. இன்று, கெரெட் ஹவுஸ் வார்சாவின் தனித்துவமான கட்டிடக்கலை அடையாளங்களில் ஒன்றாகத் திகழ்கிறது.

பயன்பாடற்றதாகத் தோன்றும் மிகச் சிறிய இடத்தைக்கூடச் சிறந்த வடிவமைப்பின் மூலம் பயனுள்ள இடமாக மாற்ற முடியும் என்பதற்கு  இந்த வீடு ஒரு சிறந்த எடுத்துக்காட்டு.