.png){kind=logo}
மாத்தறை, தேவேந்திரமுனை விகாரையை மையமாகக் கொண்டு நடைபெறவுள்ள பெரஹரா ஊர்வலத்தைச் சுற்றி ஏற்பட்டதாகக் கூறப்படும் கருத்து முரண்பாடு, தற்போது துப்பாக்கிச் சூடு மற்றும் கொலை மிரட்டல் வரை தீவிரமடைந்துள்ளதாக தகவல்கள் வெளியாகியுள்ளன. இதன் காரணமாக, எதிர்வரும் பெரஹரா நிகழ்வுக்கு விசேட பாதுகாப்பு ஏற்பாடுகளை மேற்கொள்ள பொலிஸார் நடவடிக்கை எடுத்துள்ளனர்.
குறித்த விகாரைக்கு அருகில் அமைந்துள்ள வீடொன்றின் மீது கடந்த 21ஆம் திகதி இரவு இனந்தெரியாத துப்பாக்கிதாரி ஒருவர் துப்பாக்கிச் சூடு நடத்தியதாகத் தெரிவிக்கப்படுகிறது. துப்பாக்கிச் சூடு நடத்தப்பட்ட வீடு விகாரையிலிருந்து சுமார் 200 மீற்றர் தொலைவில் அமைந்துள்ளதாகவும், சந்தேகநபர் காரில் வந்து இந்தத் தாக்குதலை மேற்கொண்டதாகவும் ஆரம்பகட்ட தகவல்கள் தெரிவிக்கின்றன.
இந்தச் சம்பவத்தின் பின்னணியில் திட்டமிட்ட குற்றச்செயல்களுடன் தொடர்புடையதாக பொலிஸாரால் சந்தேகிக்கப்படும் இரு தரப்பினருக்கு இடையிலான மோதல் இருக்கலாம் என விசாரணையாளர்கள் சந்தேகிக்கின்றனர். குறிப்பாக, ‘தெஹிபாலே மல்லி’ மற்றும் ‘கஞ்சிபானை இம்ரான்’ ஆகியோருடன் தொடர்புடைய தரப்பினருக்கு இடையிலான முரண்பாடுகள் குறித்து பொலிஸார் கவனம் செலுத்தி வருவதாகத் தகவல்கள் வெளியாகியுள்ளன.
தேவேந்திரமுனை பெரஹராவில் பங்கேற்கும் காவடி நடனக் குழுக்களின் எண்ணிக்கையை குறைப்பது தொடர்பாக கடந்த 20ஆம் திகதி விகாரையின் பஸ்நாயக்க நிலமேக்கு கொலை மிரட்டல் விடுக்கப்பட்டதாகவும் தெரிவிக்கப்பட்டுள்ளது. இதனைத் தொடர்ந்து, மற்றொரு தரப்பினருக்கு எதிராக கொலை மிரட்டல் விடுக்கப்பட்டதாகக் கூறப்படும் குரல் பதிவொன்றும் சமூக வலைத்தளங்களில் பரவியதாக தகவல்கள் வெளியாகியுள்ளன.
இந்த தொடர்ச்சியான மிரட்டல் சம்பவங்களுக்குப் பின்னரே விகாரைக்கு அருகிலுள்ள வீடு மீது துப்பாக்கிச் சூடு நடத்தப்பட்டுள்ளதால், பெரஹரா நிகழ்வைச் சுற்றியுள்ள பாதுகாப்பு நிலைமை தொடர்பாக பொலிஸார் தீவிர கவனம் செலுத்தி வருகின்றனர்.
பெரஹரா போன்ற பெருமளவிலான மக்கள் கலந்து கொள்ளும் மத மற்றும் கலாசார நிகழ்வுகளின் போது எந்தவொரு அசம்பாவிதமும் ஏற்படாத வகையில், விசேட பொலிஸ் பாதுகாப்பு வழங்கப்படவுள்ளதாக தெரிவிக்கப்படுகிறது. சந்தேகத்திற்கிடமான நபர்கள் மற்றும் வாகனங்கள் தொடர்பில் கண்காணிப்பு நடவடிக்கைகள் அதிகரிக்கப்படுவதுடன், சம்பவத்துடன் தொடர்புடையவர்களை அடையாளம் காணவும் விசாரணைகள் முன்னெடுக்கப்பட்டு வருகின்றன.
எனினும், துப்பாக்கிச் சூட்டின் பின்னணி மற்றும் அதில் தொடர்புடைய நபர்கள் குறித்த தகவல்கள் தொடர்பான விசாரணைகள் தற்போது நடைபெற்று வருவதால், அதிகாரப்பூர்வ விசாரணைகள் நிறைவடையும் வரை எந்தவொரு தரப்பையும் குற்றவாளி என உறுதியாகக் கூற முடியாது.
இந்தச் சம்பவம் தொடர்பான தகவல்கள் ஆரம்பகட்ட பொலிஸ் விசாரணைகள் மற்றும் வெளியாகியுள்ள தகவல்களின் அடிப்படையிலானவை. குற்றச்சாட்டுகள் தொடர்புடைய நபர்களின் குற்றம் நீதிமன்றத்தில் நிரூபிக்கப்படும் வரை அவர்கள் சட்டரீதியாக நிரபராதிகளாகவே கருதப்படுவர்.
கருத்துகள்
கருத்தைப் பதிவிடுக