அமெரிக்காவில் குடும்பத் தகராறு; கூகுள் முன்னாள் இந்திய வம்சாவளி பெண் அதிகாரி துப்பாக்கிச் சூட்டில் உயிரிழப்பு

அமெரிக்காவின் ஜார்ஜியா மாநிலத்தில் இடம்பெற்ற குடும்பத் தகராறு துயர சம்பவமாக மாறியுள்ளது. கூகுள் நிறுவனத்தின் பொறியியல் பிரிவில் தலைமைப் பொறுப்பில் பணியாற்றிய இந்திய வம்சாவளியைச் சேர்ந்த ஷீத்தல் (57) என்பவர் துப்பாக்கிச் சூட்டில் உயிரிழந்துள்ளதாக அமெரிக்க அதிகாரிகள் தெரிவித்துள்ளனர். இந்தச் சம்பவம் ஜார்ஜியா மாநிலத்தின் காப் கவுண்டியில் அமைந்துள்ள ஸ்மைர்னா நகரில் உள்ள அவரது இல்லத்தில் இடம்பெற்றுள்ளது.

பொலிஸாரின் ஆரம்பகட்ட விசாரணைகளின்படி, குடும்பத்தினருக்கிடையே ஏற்பட்ட வாக்குவாதம் தீவிரமடைந்த நிலையில், ஷீத்தலின் கணவர் கிர்க் வர்செசியன் துப்பாக்கியால் சுட்டதாக தெரிவிக்கப்படுகிறது. துப்பாக்கிச் சத்தம் கேட்ட அக்கம்பக்கத்தினர் உடனடியாக அவசர சேவைக்கு தகவல் வழங்கியதைத் தொடர்ந்து, சம்பவ இடத்திற்கு விரைந்த பொலிஸார் ஷீத்தலையும் அவரது மகன் ஜேசனையும் குண்டுக் காயங்களுடன் மீட்டனர்.

இருவரும் அவசரமாக மருத்துவமனைக்கு கொண்டு செல்லப்பட்ட போதிலும், ஷீத்தல் சிகிச்சை பலனின்றி உயிரிழந்தார். அவரது மகன் ஜேசன் தற்போது தீவிர சிகிச்சைப் பிரிவில் அனுமதிக்கப்பட்டு சிகிச்சை பெற்று வருவதாக அதிகாரிகள் தெரிவித்துள்ளனர். அவரது உடல்நிலை குறித்து மேலதிக தகவல்கள் இதுவரை வெளியிடப்படவில்லை.

சம்பவத்துடன் தொடர்புடையதாக ஷீத்தலின் கணவர் கிர்க் வர்செசியன் கைது செய்யப்பட்டுள்ளார். துப்பாக்கிச் சூடு இடம்பெற காரணமான சூழ்நிலைகள், குடும்பப் பின்னணி மற்றும் சம்பவத்தின் முழுமையான விவரங்கள் குறித்து அமெரிக்க பொலிஸார் தொடர்ந்து விசாரணை நடத்தி வருகின்றனர்.

இந்திய வம்சாவளியைச் சேர்ந்த ஷீத்தல், அமெரிக்காவுக்கு குடிபெயர்வதற்கு முன்னர் இந்தியா, இங்கிலாந்து மற்றும் கானா ஆகிய நாடுகளில் வசித்துள்ளார். 1994 ஆம் ஆண்டு ஜார்ஜியா தொழில்நுட்பக் கழகத்தில் கணினி அறிவியலில் பட்டம் பெற்ற அவர், தகவல் தொழில்நுட்பத் துறையில் 20 ஆண்டுகளுக்கும் மேலான அனுபவத்தைக் கொண்டிருந்தார். பல்வேறு சர்வதேச தொழில்நுட்ப நிறுவனங்களில் முக்கிய நிர்வாகப் பொறுப்புகளை வகித்த பின்னர், கூகுள் நிறுவனத்தின் பொறியியல் பிரிவிலும் தலைமைப் பொறுப்பில் பணியாற்றியுள்ளார்.

தொழில்நுட்பத் துறையில் குறிப்பிடத்தக்க பங்களிப்பை வழங்கிய ஷீத்தலின் திடீர் மரணம் அமெரிக்காவிலும், இந்திய வம்சாவளியினரிடையிலும் பெரும் அதிர்ச்சியை ஏற்படுத்தியுள்ளது. இந்த சம்பவம் குடும்ப வன்முறை மற்றும் துப்பாக்கி பாதுகாப்பு தொடர்பான விவாதங்களையும் மீண்டும் முன்னிலைப்படுத்தியுள்ளது. சம்பவம் தொடர்பான மேலதிக விசாரணைகள் தொடர்ந்து முன்னெடுக்கப்பட்டு வருகின்றன.