மருத்துவப் பீட வரலாற்றில் சாதனை: ஒரே நேரத்தில் தங்கப் பதக்கங்கள் வென்றார் அபிராமி நற்குணம்

யாழ்ப்பாணப் பல்கலைக்கழகத்தின் மருத்துவப் பீட வரலாற்றில் புதிய சாதனை ஒன்று பதிவாகியுள்ளது. 19.02.2026 அன்று நடைபெற்ற பட்டமளிப்பு விழாவில், மருத்துவப் பீடத்தைச் சேர்ந்த செல்வி அபிராமி நற்குணம் ஒரே நேரத்தில் 8 தங்கப் பதக்கங்களைப் பெற்று வரலாற்றுச் சாதனை படைத்துள்ளார்.

மருத்துவக் கல்வியின் அனைத்து கட்டங்களிலும் தொடர்ந்து முதலிடத்தைப் பெற்று திகழ்ந்த இவர், கல்வி திறமை, மருத்துவ அறிவு மற்றும் நடைமுறை திறன்களில் சிறப்பாகத் திகழ்ந்துள்ளார். குறிப்பாக சத்திரசிகிச்சை, மகப்பேற்றியல் மற்றும் குழந்தை மருத்துவம் போன்ற முக்கிய துறைகளில் விசேட சித்தி பெற்றதுடன், மருத்துவப் பீடத்தின் சிறந்த மாணவி விருதையும் கைப்பற்றியுள்ளார்.

மருத்துவப் படிப்பின் முழு காலகட்டத்திலும் நிலையான கல்விச் சிறப்பை வெளிப்படுத்திய இவர், மருத்துவப் பீட வரலாற்றில் ஒரே நேரத்தில் அதிக தங்கப் பதக்கங்களை வென்ற மாணவி என்ற பெருமையைப் பெற்றுள்ளார்.

பட்டமளிப்பு விழாவில் கல்வியாளர்கள், பெற்றோர் மற்றும் மாணவர்கள் முன்னிலையில் இவரது சாதனை பாராட்டப்பட்டதுடன், எதிர்காலத்தில் சிறந்த மருத்துவ நிபுணராக உயர்வார் என்ற நம்பிக்கையும் வெளியிடப்பட்டது.

இந்த சாதனை, யாழ்ப்பாணப் பல்கலைக்கழக மருத்துவப் பீடத்தின் கல்வித் தரத்தையும் மாணவர்களின் அர்ப்பணிப்பையும் வெளிப்படுத்தும் முக்கிய நிகழ்வாகக் கருதப்படுகிறது.