நீதியரசர்களின் பதவிக்கால நீடிப்பு சர்வதேச பாதிப்பை ஏற்படுத்தும்: அரசுக்கு ஜி.எல். பீரிஸ் எச்சரிக்கை

உயர் நீதிமன்றம் மற்றும் மேன்முறையீட்டு நீதிமன்றங்களில் நிலவும் வெற்றிடங்களை நிரப்பாமல், நீதியரசர்களின் பதவிக்காலத்தை நீடிப்பதற்கான நடவடிக்கைகளை அரசு முன்னெடுத்து வருவது இலங்கையின் நீதித்துறை மீதான சர்வதேச நம்பிக்கையை பாதித்து, ஜெனிவாவில் நடைபெறவுள்ள ஐக்கிய நாடுகள் மனித உரிமைகள் பேரவை அமர்வில் நாட்டுக்கு பாதகமான விளைவுகளை ஏற்படுத்தக்கூடும் என முன்னாள் வெளிவிவகார அமைச்சர் பேராசிரியர் ஜி.எல். பீரிஸ் எச்சரித்துள்ளார்.

முன்னாள் ஜனாதிபதி ரணில் விக்ரமசிங்கவின் அரசியல் காரியாலயத்தில் நடைபெற்ற செய்தியாளர் சந்திப்பில் கருத்து வெளியிட்ட அவர், அரசமைப்புச் சட்டத்தில் மாற்றங்கள் அல்லது நீதித்துறை தொடர்பான முக்கிய தீர்மானங்களை மேற்கொள்வதற்கு முன் பொதுமக்களின் கருத்துக்களைப் பெறுவது ஜனநாயக நடைமுறையாகும் என்றார். இதற்கு உதாரணமாக, ஐக்கிய இராச்சியத்தில் இதுபோன்ற விடயங்களுக்காக விரிவான பொதுக் கருத்துக் கேட்பு நடைமுறை பின்பற்றப்பட்டதாகவும் அவர் குறிப்பிட்டார்.

வழக்குகள் தேங்கிக் கிடப்பதை காரணமாகக் கூறி நீதியரசர்களின் பதவிக்காலத்தை நீடிக்க முயற்சிக்கும் அரசு, உயர்நீதிமன்றம் மற்றும் மேன்முறையீட்டு நீதிமன்றங்களில் உள்ள காலியிடங்களை ஏன் இதுவரை நிரப்பவில்லை எனவும் அவர் கேள்வி எழுப்பினார்.

இந்த வெற்றிடங்களை நீண்டகாலமாக நிரப்பாமல் வைத்திருப்பதன் மூலம் நீதித்துறையின் செயல்திறனும், அதன் மீதான பொதுமக்களின் நம்பிக்கையும் பாதிக்கப்படுவதாக அவர் தெரிவித்தார்.

மேலும், ஐக்கிய நாடுகள் மனித உரிமைகள் பேரவை இலங்கை தொடர்பாக விசேட விசாரணைப் பொறிமுறையை உருவாக்கியுள்ள நிலையில், நாட்டின் உள்நாட்டு நீதித்துறை சுயாதீனமாகவும் வலுவாகவும் செயல்படுவது மிக முக்கியமானது என்றும், நீதித்துறையின் அரசியலாக்கம் இலங்கையின் சர்வதேச நற்பெயருக்கு பாதிப்பை ஏற்படுத்தும் என்றும் அவர் எச்சரித்தார்.

எதிர்வரும் செப்டெம்பர் மாதம் நடைபெறவுள்ள ஐக்கிய நாடுகள் மனித உரிமைகள் பேரவை அமர்வில் இந்த விவகாரம் இலங்கைக்கு எதிராக பயன்படுத்தப்படக்கூடும் என்றும், குறுகிய அரசியல் நோக்கங்களுக்காக நாட்டை சர்வதேச அழுத்தங்களுக்கு உள்ளாக்குவது ஏற்றுக்கொள்ள முடியாத செயல் என்றும் ஜி.எல். பீரிஸ் தெரிவித்தார்.

சட்டத்தரணிகள் சங்கம் உள்ளிட்ட பல்வேறு சிவில் சமூக அமைப்புகள் நீதியரசர்களின் பதவிக்கால நீடிப்பு தொடர்பாக எதிர்ப்பை வெளியிட்டிருந்த போதிலும், அரசு அவற்றின் கருத்துக்களுக்கு உரிய முக்கியத்துவம் வழங்கவில்லை என்றும் அவர் குற்றம்சாட்டினார்.