.png){kind=logo}
ஆப்பிள் நிறுவனம் தனது தயாரிப்புகளின் விலைகளை உயர்த்த வேண்டிய சூழ்நிலை உருவாகியுள்ளதாக அதன் தலைமை நிர்வாக அதிகாரி டிம் குக் தெரிவித்துள்ளார்.
சர்வதேச ஊடகமொன்றுக்கு வழங்கிய பேட்டியில் அவர் இதனைத் தெரிவித்தார். உலகளவில் செயற்கை நுண்ணறிவு தொழில்நுட்பத்தின் வேகமான வளர்ச்சியால் மெமரி மற்றும் ஸ்டோரேஜ் சிப்களுக்கான தேவை குறிப்பிடத்தக்க அளவில் அதிகரித்துள்ளதாக அவர் கூறினார்.
செயற்கை நுண்ணறிவு தரவு மையங்கள் மற்றும் உயர் திறன் கொண்ட கணினி அமைப்புகளுக்கான தேவைகள் உயர்ந்து வருவதால், தொழில்நுட்ப நிறுவனங்களுக்கிடையே மெமரி மற்றும் ஸ்டோரேஜ் கூறுகளைப் பெறுவதற்கான போட்டி தீவிரமடைந்துள்ளது. இதன் விளைவாக உற்பத்திச் செலவுகள் கணிசமாக உயர்ந்துள்ளதாகவும் அவர் சுட்டிக்காட்டினார்.
இந்த அதிகரித்த செலவினங்களை ஈடுகட்டுவதற்காக தயாரிப்புகளின் விலைகளை உயர்த்த வேண்டிய கட்டாயம் ஏற்பட்டுள்ளதாக டிம் குக் தெரிவித்தார். இதுவரை வாடிக்கையாளர்களை விலை உயர்வின் தாக்கத்திலிருந்து பாதுகாக்க நிறுவனம் பல்வேறு நடவடிக்கைகளை மேற்கொண்டதாகவும், ஆனால் தற்போதைய சூழ்நிலையில் அதை மேலும் தொடர்வது சாத்தியமற்றதாக மாறியுள்ளதாகவும் அவர் குறிப்பிட்டார்.
எனினும், எந்தெந்த தயாரிப்புகளின் விலைகள் உயர்த்தப்படும், விலை உயர்வு எப்போது முதல் அமல்படுத்தப்படும் மற்றும் எவ்வளவு அளவு அதிகரிப்பு மேற்கொள்ளப்படும் என்பது தொடர்பான அதிகாரப்பூர்வ விவரங்கள் இதுவரை வெளியிடப்படவில்லை.
செயற்கை நுண்ணறிவு சேவையகங்களில் பயன்படுத்தப்படும் அதி-அலைவரிசை மெமரிக்கான தேவை அதிகரித்துள்ளதால், உலகளாவிய மெமரி விநியோகத்தில் அழுத்தம் ஏற்பட்டுள்ளதாகவும், குறிப்பாக DRAM மெமரியின் விலை உயர்வு ஆப்பிள் நிறுவனத்திற்கு சவாலாக இருப்பதாகவும் டிம் குக் தெரிவித்துள்ளார்.
நுகர்வோர் மின்னணு சாதனங்களுக்கான மெமரி விநியோகம் குறைந்துள்ள நிலையில், உற்பத்தியாளர்கள் விலைகளை உயர்த்தியிருப்பதாகவும், சந்தை மீண்டும் சமநிலைக்கு திரும்புவது அவசியம் எனவும் அவர் வலியுறுத்தினார்.
மேலும், மெமரி விநியோகத் தட்டுப்பாட்டை சமாளிக்க தேவையான சந்தை ஆதரவுகளை வழங்க ஆப்பிள் நிறுவனம் தனது நிதி வளங்களை பயன்படுத்தத் தயாராக இருப்பதாக தெரிவித்தார். அதேவேளை, நிறுவனம் தனியாக மெமரி மற்றும் ஸ்டோரேஜ் உற்பத்தி ஆலைகளை அமைக்கும் திட்டம் எதுவும் தற்போது இல்லை என்றும் அவர் தெளிவுபடுத்தினார்.
கருத்துகள்
கருத்தைப் பதிவிடுக