.png){kind=logo}
கம்போடியாவில் இணையவழி மோசடி கும்பல்களுக்கு எதிராக முன்னெடுக்கப்பட்டு வரும் கடுமையான சட்ட நடவடிக்கைகள் மற்றும் சுற்றிவளைப்புகளின் பின்னணியில், சர்வதேச இணைய மோசடி வலையமைப்புகள் தங்களது செயல்பாட்டு தளங்களை இலங்கையை நோக்கி மாற்றி வருவதாக புலனாய்வு தரப்புகள் எச்சரிக்கை விடுத்துள்ளன.
குறிப்பாக, இலங்கையின் மேற்கு கடற்கரைப் பகுதிகள், சுற்றுலா மையங்கள், அடுக்குமாடி குடியிருப்புகள் மற்றும் தனியார் அலுவலக வளாகங்கள் ஆகியவை இவ்வகை மோசடி வலையமைப்புகளின் புதிய தளங்களாக பயன்படுத்தப்பட்டு வருவதாக தெரிவிக்கப்படுகிறது. விசா பெறும் நடைமுறைகளில் காணப்படும் எளிமை, வளர்ச்சியடைந்த தொலைத்தொடர்பு வசதிகள் மற்றும் சில முறைசாரா பணப்பரிமாற்ற அமைப்புகள் ஆகியவை இந்தக் குழுக்களுக்கு சாதகமான சூழலை உருவாக்கியுள்ளதாக நிபுணர்கள் சுட்டிக்காட்டுகின்றனர்.
இந்த அச்சுறுத்தலை கட்டுப்படுத்தும் நோக்கில் இலங்கை அதிகாரிகள் புதிய இணைய குற்றப்பிரிவை உருவாக்கியுள்ளதுடன், இந்த ஆண்டில் மட்டும் மேற்கொள்ளப்பட்ட பல்வேறு சுற்றிவளைப்புகளில் 1,000-க்கும் அதிகமான சந்தேகநபர்கள் கைது செய்யப்பட்டுள்ளனர். கடந்த ஏப்ரல் மாதம் மேற்குக் கடற்கரைப் பகுதியில் நடத்தப்பட்ட நடவடிக்கையில் 150-க்கும் மேற்பட்ட வெளிநாட்டவர்கள் கைது செய்யப்பட்டதுடன், பின்னர் கொழும்பு அருகிலுள்ள குடியிருப்பு வளாகத்தில் மேற்கொள்ளப்பட்ட சோதனையில் மேலும் 120 வெளிநாட்டு பிரஜைகள் கைது செய்யப்பட்டிருந்தனர்.
காவல்துறையின் கண்காணிப்பு அதிகரித்துள்ள நிலையில், மோசடி கும்பல்கள் பெரிய வளாகங்களை விட்டு வெளியேறி குறுகிய கால வாடகை வீடுகள், விருந்தகங்கள் மற்றும் சிறிய அலுவலகங்களை பயன்படுத்தி தங்களது செயற்பாடுகளை முன்னெடுத்து வருவதாக தகவல்கள் தெரிவிக்கின்றன.
மேலும், தென்கிழக்கு ஆசிய நாடுகளில் இருந்து தப்பித்து வந்த சிலர் கூட இத்தகைய சந்தேகத்திற்கிடமான மையங்களில் பணியாற்றக்கூடும் என புலனாய்வாளர்கள் எச்சரித்துள்ளனர். இந்த நிலைமை, சர்வதேச குற்ற வலையமைப்புகள் புதிய நாடுகளை குறிவைத்து தங்களது நடவடிக்கைகளை விரிவுபடுத்தும் ஆபத்தான போக்கை வெளிப்படுத்துவதாக நிபுணர்கள் கருதுகின்றனர்.
கருத்துகள்
கருத்தைப் பதிவிடுக