மகிந்த - பிள்ளையான் சந்திப்புச் செய்தி அப்பட்டமான பொய்

முன்னாள் ஜனாதிபதி மஹிந்த ராஜபக்ஷ, மட்டக்களப்பு சிறைச்சாலைக்குச் சென்று பிள்ளையானை (சிவநேசதுரை சந்திரகாந்தன்) சந்தித்ததாகக் கூறப்படும் தகவல் முற்றிலும் பொய்யானது என்று பிவோடரு ஹெல உறுமயவின் தலைவரும் முன்னாள் நாடாளுமன்ற உறுப்பினருமான உதய கம்மன்பில தெரிவித்துள்ளார்.

கொழும்பில் நடைபெற்ற ஊடகவியலாளர் சந்திப்பொன்றின் போதே அவர் இந்த விபரங்களை வெளியிட்டார்.

அசாத் மௌலானா சர்வதேச ஊடகமான சனல் 4 (Channel 4) இல் வெளியிட்ட தகவல்கள் குறித்து உதய கம்மன்பில பின்வருமாறு விளக்கமளித்துள்ளார்:

பதிவேடு சாட்சி: மஹிந்த ராஜபக்ஷ சிறைக்குச் சென்று பிள்ளையானைச் சந்தித்ததாக அசாத் மௌலானா கூறியது பொய். மட்டக்களப்பு சிறைச்சாலையின் விசேட விருந்தினர் வருகைப் பதிவேட்டை (Visitors Log) சோதித்தாலே இது அப்பட்டமான பொய் என்பது நிரூபணமாகிவிடும்.

ஆணைக்குழுவின் அறிக்கை: அசாத் மௌலானாவின் கருத்துக்கள் முற்றிலும் பொய்யானவை என உயர் நீதிமன்ற முன்னாள் நீதியரசர் எஸ்.ஐ. இமா தலைமையிலான ஜனாதிபதி விசாரணை ஆணைக்குழு ஏற்கனவே தீர்ப்பளித்துள்ளது. மேலும், அவதூறு பரப்பிய அவருக்கு எதிராகச் சட்ட நடவடிக்கை எடுக்குமாறும் அந்த ஆணைக்குழு பரிந்துரைத்திருந்தது.

ஈஸ்டர் தாக்குதல் குறித்து அசாத் மௌலானாவிடம் வாக்குமூலம் பெற, முன்னாள் சிஐடி பணிப்பாளர் ஷானி அபேசேகர பிரான்ஸ் சென்றமை குறித்து கம்மன்பில கடுமையான கேள்விகளை எழுப்பியுள்ளார்:

சுவிட்சர்லாந்தில் உள்ளவரை பிரான்சில் தேடியது ஏன்?: அசாத் மௌலானா தற்போது சுவிட்சர்லாந்தில்தான் வசிக்கிறார். ஆனால், ஷானி அபேசேகர பிரான்ஸிற்குச் சென்றுள்ளார். தனக்குரிய ஏதோவொரு தனிப்பட்ட வேலை அல்லது மருத்துவச் சிகிச்சையை அரசாங்கப் பணத்தில் நிறைவேற்றிக் கொள்ளவே ஷானி அபேசேகர இந்த விசாரணை நாடகத்தை அரங்கேற்றினாரா என்ற சந்தேகம் எழுகிறது.

கைது செய்யாதது ஏன்?: பிரான்சில் உள்ள இலங்கை தூதரகம் என்பது இலங்கையின் இறையாண்மைக்கு உட்பட்ட பகுதி. அங்கு வைத்து அசாத் மௌலானாவைச் சட்டப்படி கைது செய்ய அதிகாரம் இருந்தும், ஷானி அபேசேகர அவரைச் சுதந்திரமாக விட்டுவிட்டு வந்ததன் பின்னணியில் உள்ள மர்மம் என்ன?

அசாத் மௌலானா மீதான பாரதூரமான குற்றச்சாட்டுகள்:
"ஈஸ்டர் தாக்குதலில் தொடர்புடைய சாரா ஹசீமின் சகோதரர் ரில்வானுக்கு, கொழும்பு தேசிய வைத்தியசாலையில் ரகசிய சிகிச்சை பெற உதவியமை, போலி அடையாளத்தில் இரண்டாவது திருமணம் செய்தமை, மணப்பெண்ணின் தந்தையைக் காசோலை மோசடி மூலம் ஏமாற்றியமை மற்றும் குடிவரவு சட்டங்களை மீறி நாட்டை விட்டு தப்பிச் சென்றமை எனப் பல பிடியாணை உத்தரவுகள் அசாத் மௌலானாவுக்கு எதிராக உள்ளன. இவ்வாறான ஒரு குற்றவாளியைச் சந்திக்க மக்கள் பணத்தை வீணடிப்பது எவ்வகையில் நியாயம்?" என உதய கம்மன்பில கேள்வி எழுப்பியுள்ளார்.