ஈரான்அமெரிக்க பேச்சுவார்த்தையில் முன்னேற்றம் ஹோர்முஸ் நடவடிக்கையை தற்காலிகமாக நிறுத்தினார் ட்ரம்ப்

அமெரிக்க ஜனாதிபதி டொனால்ட் ட்ரம்ப் உலகளாவிய கவனத்தை ஈர்க்கும் முக்கிய அறிவிப்பு ஒன்றை வெளியிட்டுள்ளார். ஈரானுடன் நடைபெற்று வரும் பேச்சுவார்த்தைகளில் ஏற்பட்டுள்ள முன்னேற்றம் மற்றும் பாகிஸ்தானின் வேண்டுகோளை கருத்தில் கொண்டு, “Project Freedom” எனப்படும் ஹோர்முஸ் நீரிணை வழியாக கப்பல் இயக்க நடவடிக்கை தற்காலிகமாக நிறுத்தப்பட்டுள்ளதாக அவர் தெரிவித்துள்ளார்.

ட்ரம்ப் தனது Truth Social தளத்தில் வெளியிட்ட பதிவில், ஈரான் விவகாரத்தில் அமெரிக்கா குறிப்பிடத்தக்க முன்னேற்றங்களை அடைந்துள்ளதாகவும், இரு தரப்புகளுக்கிடையே இறுதி ஒப்பந்தம் ஒன்றை எட்டுவதற்கான வாய்ப்பு அதிகரித்துள்ளதாகவும் குறிப்பிட்டுள்ளார்.

இந்த முன்னேற்றங்களை மதிப்பீடு செய்யும் நோக்கத்திலேயே நடவடிக்கை தற்காலிகமாக இடைநிறுத்தப்பட்டதாகவும் அவர் விளக்கமளித்துள்ளார். இருப்பினும், ஹோர்முஸ் நீரிணையில் அமெரிக்க கடற்படை கண்காணிப்பு மற்றும் பாதுகாப்பு நடவடிக்கைகள் தொடர்ந்து முழு வீச்சில் நடைபெறும் என்றும் அவர் உறுதிப்படுத்தியுள்ளார்.

இந்த அறிவிப்பு மத்திய கிழக்கு அரசியல் சூழலில் புதிய எதிர்பார்ப்புகளை உருவாக்கியுள்ள நிலையில், உலக நாடுகள் இதை கவனமாக கண்காணித்து வருகின்றன.