ஆக்ஷன் விருந்தாக வந்துள்ள 'வார் மிஷின்': நெட்ப்ளிக்ஸ் ரசிகர்களைக் கவர்ந்ததா?

ஹாலிவுட் இயக்குனர் பேட்ரிக் ஹியூஸ் இயக்கத்தில் ஆலன் ரிட்சன் நடிப்பில் வெளியாகியுள்ள 'வார் மிஷின்', ஆக்‌ஷன் ரசிகர்களுக்கான ஒரு முழுநீள விருந்தாக அமைந்துள்ளது. ராணுவ பொறியாளராகப் பணியாற்றும் நாயகன், தாலிபான் தாக்குதலில் தனது தம்பியைப் பறிகொடுத்த பின், அவனது இலட்சியத்திற்காகக் கடுமையான பயிற்சிகளை மேற்கொண்டு 'ரேஞ்சர்' குழுவின் தலைவராகிறார். ஒரு பயிற்சியின் போது வழிதவறிச் செல்லும் நாயகனின் குழு, அங்கு வேற்று கிரகத்தைச் சேர்ந்த அதிநவீன இயந்திரம் ஒன்றிடம் சிக்கிக்கொள்கிறது. அந்த மிஷினிடமிருந்து நாயகன் தனது குழுவை எப்படிக் காப்பாற்றுகிறார், அந்த இயந்திரத்தை எப்படி அழிக்கிறார் என்பதைப் பரபரப்பான ஆக்‌ஷன் காட்சிகளுடன் படம் விவரிக்கிறது.

தொழில்நுட்ப ரீதியாகச் சிறந்த சிஜி (CG) வேலைப்பாடுகள், ஒளிப்பதிவு மற்றும் இசை என அனைத்தும் பிரமாதமாக அமைந்திருந்தாலும், படத்தின் கதைக்களம் ஏற்கனவே பலமுறை பார்த்த அர்னால்டின் 'பிரிடேட்டர்' (Predator) படத்தின் சாயலில் இருப்பது ஒரு பலவீனமாகப் பார்க்கப்படுகிறது. படத்தில் ஆக்‌ஷன் காட்சிகளுக்குக் குறைவே இல்லை என்றாலும், ஒரு திரில்லர் படத்திற்குத் தேவையான பதற்றமும், எதிர்பாராத திருப்பங்களும் இல்லாதது சற்று ஏமாற்றத்தை அளிக்கிறது. இருப்பினும், தேவையற்ற வசனங்கள் இன்றி ஆரம்பம் முதல் இறுதி வரை விறுவிறுப்பாகச் செல்லும் திரைக்கதைக்காகவும், பிரம்மாண்டமான சண்டைக் காட்சிகளுக்காகவும் ஆக்‌ஷன் விரும்பிகள் இந்தப் படத்தை ஒருமுறை தாராளமாகப் பார்க்கலாம்.