வாடகைச் சந்தைக்கு பாரிய பாதிப்பு ஏற்படும் அபாயம் அலி சப்ரி எச்சரிக்கை

இலங்கையின் வாடகைச் சந்தை மற்றும் நாட்டின் பொருளாதாரத்தில் பாரிய சட்டச் சிக்கல்கள் ஏற்படும் அபாயம் உள்ளதாக முன்னாள் நீதியமைச்சர் அலி சப்ரி எச்சரிக்கை விடுத்துள்ளார். 2025ஆம் ஆண்டிற்கான குடியிருப்பாளர்கள் பாதுகாப்புச் சட்டமூலம் தற்போதைய வடிவில் நடைமுறைப்படுத்தப்பட்டால், இந்த சிக்கல்கள் மேலும் தீவிரமடையும் என்றும் அவர் குறிப்பிட்டுள்ளார்.

இந்த வரைவுச் சட்டம் வாடகைச் சந்தையையும், நீண்டகால அடிப்படையில் வாடகைக்கு குடியிருப்பவர்களையும் நேரடியாக பாதிக்கும் என சுட்டிக்காட்டிய அலி சப்ரி, சீர்திருத்தம் என்ற பெயரில் நாடு மீண்டும் காலாவதியான சட்டங்களை நோக்கிச் செல்லக்கூடாது என அதிகாரிகளிடம் கேட்டுக்கொண்டுள்ளார்.

இலங்கை ஏற்கனவே 1972ஆம் ஆண்டின் வாடகைச் சட்டம் போன்ற கடுமையான சட்டங்களிலிருந்து விலகி, 2023ஆம் ஆண்டின் 1ஆம் இலக்க சட்டத்தின் மூலம் சமநிலையான சட்டக் கட்டமைப்பை உருவாக்கியுள்ளதாகவும், அந்த நிலையில் இருந்து மீண்டும் பழைய சட்ட நிலைக்குத் திரும்புவது ஆபத்தானது எனவும் அவர் தெரிவித்துள்ளார்.

புதிய சட்டத்தின் கீழ், வாடகைதாரர் ஒருவர் மாதாந்த வாடகை, நீர் மற்றும் மின்சாரக் கட்டணங்களைச் செலுத்தத் தவறினாலும், நீதிமன்ற நடவடிக்கைகள் நிறைவடையும் வரை அத்தியாவசிய சேவைகளை வழங்க நில உரிமையாளர் கட்டாயப்படுத்தப்படுவார். இது நில உரிமையாளர்களிடையே பெரும் அச்சத்தை ஏற்படுத்தும் என்றும் அவர் கூறியுள்ளார்.

இதன் விளைவாக, வீடுகளுக்கான விநியோகம் குறையக்கூடும், வாடகை விலைகள் உயரக்கூடும், இறுதியில் இதன் தாக்கம் வாடகைக்கு குடியிருப்பவர்களையே கடுமையாக பாதிக்கும் என்றும் முன்னாள் நீதியமைச்சர் அலி சப்ரி எச்சரித்துள்ளார்.