ஏப்ரலில் அரிசிக்கு கடும் தட்டுப்பாடு ஏற்படும் அபாயம்: சம்பா, கீரி சம்பா விலைகளும் கிடுகிடு உயர்வு!

இலங்கையில் எதிர்வரும் ஏப்ரல் மாதமளவில் பச்சை அரிசி மற்றும் ‘நாடு’ அரிசிக்கு பாரிய தட்டுப்பாடு ஏற்படும் அபாயம் இருப்பதாக மரதகமுல சிறு மற்றும் நடுத்தர அளவிலான அரிசி ஆலை உரிமையாளர்கள் சங்கம் எச்சரிக்கை விடுத்துள்ளது. அத்துடன், சந்தையில் தற்போது நிலவும் விலையேற்றம் பண்டிகைக் காலத்தில் மேலும் அதிகரிக்கக்கூடும் என அந்தச் சங்கத்தின் தலைவர் பி.கே. ரஞ்சித் தெரிவித்துள்ளார்.

சந்தையில் தற்போது சம்பா மற்றும் கீரி சம்பா அரிசிகளின் விலைகள் கட்டுப்பாடின்றி உயர்ந்துள்ள நிலையில், நுகர்வோர் மலிவான அரிசி வகைகளை நாடுவதால் அவற்றிற்கும் தட்டுப்பாடு ஏற்படும் சூழல் உருவாகியுள்ளது.

ஆலை உரிமையாளர்களின் கோரிக்கை:

சம்பா மற்றும் கீரி சம்பா விலைகள் உயரும் போது, சந்தையில் நாடு மற்றும் பச்சை அரிசிகளுக்கான கேள்வி அதிகரித்து தட்டுப்பாடு உருவாகும். இது நெல் விலையை உயர்த்த வழிவகுக்கும். எனவே, நெல் விலை உயர்த்தப்படுமானால், அதன் பயன் விவசாயிகளுக்குச் சென்றடையும் வகையில் நியாயமான விலையை அவர்களுக்கு உறுதிப்படுத்த வேண்டும் என ஆலை உரிமையாளர்கள் வலியுறுத்தியுள்ளனர்.